Kwenye historia ya hip hop nchini Tanzania, jina la Albert Mangwea ni lazima litajwe. Huwezi kuzungumzia muziki huu bila kumkumbuka mkali huyu. Mangwea hakuwa tu msanii wa rap, bali alikuwa mwasisi aliyechochea mapinduzi kwenye tasnia ya hip hop Tanzania. Katika kusherehekea miaka 51 ya hip hop, hatuwezi kusahau urithi wake ambao umeacha alama isiyofutika kwenye muziki wa kizazi kipya.
Safari yake ilianza mapema miaka ya 2000 na kutikisa tasnia alipotoa albamu yake ya kwanza, AKA MIMI. Humo, Mangwea alionyesha kipaji chake cha kuwasilisha simulizi za maisha ya mtaani, zikigusa nyoyo za wengi. Nyimbo kama “Mikasi”,”CNN”, “kimya kimya” na “Ghetto Langu” zilikuwa sauti ya jamii, zikionyesha hali halisi za maisha ya kawaida ya Watanzania.
Lakini Mangwea hakuwa msanii tu; alikuwa sauti ya waliosahaulika. Muziki wake ulikuwa kimbilio la wale waliojikuta wakikabiliwa na changamoto za kijamii kama umasikini na ukosefu wa ajira. Akiwa mfalme wa freestyle, Mangwea aliwapa matumaini na msukumo vijana wa Kitanzania kupitia mistari yake yenye nguvu.
Sikiliza mix yenye nyimbo zake kali: https://mdundo.ws/Mangwea
Kwa njia yake ya kipekee, Mangwea alifungua njia kwa wasanii wengi waliofuata, akithibitisha kuwa inawezekana kufanikiwa bila kupoteza uhalisia. Aliwavutia wasanii kama Fid Q, Quick Rocka, na Joh Makini, wakiongozwa na urithi wake wa ujasiri na ukweli.
Kifo chake mnamo 2013 kilitikisa tasnia ya muziki, lakini kazi zake zimeendelea kuishi na kuwa chemchemi ya msukumo kwa wasanii wa leo. Mchango wake katika hip hop ya Tanzania hauwezi kupuuzwa, na ushawishi wake bado unahisiwa mpaka leo.
Tukiadhimisha miaka 51 ya hip hop, tunamuenzi Mangwea kama nguzo ya muziki huu—ishara ya kweli ya hip hop ya Tanzania: halisi, moja kwa moja, na ya kimapinduzi.
Subscribe new DJ mixes on Mdundo: https://mdundo.ws/BekaB
